Berre eit steinkast unna

Om Steinparken

Steinparken er ein del av den naturfaglege formidlinga ved Besøkssenter Folgefonna nasjonalpark. Føremålet med Steinparken er å stimulera interessa for  natur- og kulturhistorie og å auka opplevingsverdien ved aktivt friluftsliv.

Jorda si 4600 millionar lange historie er full av dramatikk og fantastiske hendingar, like frå starten og fram til den korte historia til menneska. I Steinparken fortel vi historia til Jorda og det unike Livet. Det gjer vi gjennom filmane Livet på Jorda snakkar ut!, Slik tok menneska over Jorda, Livet er alltid i endring og Tidsaksen, ein 23 meter lang polert granittvegg der nokre av dei viktigaste hendingane i Jorda si historie er skrivne inn i stein. Alle desse tala og dei lange geologiske tidshorisontane er svært vanskeleg å fatta for oss menneske, difor er mykje av utviklinga på jorda, uoversiktleg, ukjent og kaotisk for dei fleste, både lekfolk og mange forskarar. Ein måte å illustrera dette på slik at ein kan få oversikt, er ved ein fysisk akse der dei ulike hendingane er plotta inn, slik vi har gjort i Steinparken.

Steinparken er sidan starten i 2003 utvikla som ein kunnskapspark av Rosendalstiftinga i samarbeid med nokre av Noregs fremste fagpersonar og formidlarar ved universiteta i Bergen og Oslo og Fossheim steinsenter i Lom. Kunstnaren Bård Breivik har saman med steinhoggar Rolf Karslen og parkentrepenør Torkjell Nerhus lagt føringane for den estetiske utforminga. Steinparken er utvikla med  økonomisk støtte frå Hordaland/Vestland fylkeskommune, Kvinnherad kommune, Miljødirektoratet, Folgefonna nasjonalparksenter, Sparebankstiftelsen DNB, Sparebankstiftinga Kvinnherad, Norsafe as, Harding Trading as, SKL as og Nasjonalforeninga for folkehelse.